ب چاڤدێریا پارێزگه‌رێ‌ دهوكێ‌ (5) قوتابخانه‌یێن نوو ل سنورێ‌ قه‌زا زاخو هاتنه‌ ڤه‌كرن

    به‌لاڤكرن: رێڤه‌به‌ریا گشتى یا په‌روه‌ردا پارێزگه‌ها دهوك
    04 چرێا دووێ 2019


بو دووڤ چونا پروژێن خزمه‌تكاری وزانینا پێدڤیێن ده‌ڤه‌رێ‌ ئه‌ڤرو سپێدێ‌ 4/ 11/2019 به‌رێز فه‌رهاد ئه‌مین ئه‌تروشی پارێزگه‌رێ‌ دهوكێ‌ وئه‌ندازیا ئوسمان یونس جێگرێ‌ پارێزگه‌رێ‌ دهوكێ‌ بو كاروبارێن ته‌كنیكی وعمر على تاها رێڤه‌به‌رێ‌ گشتی یێ‌ په‌روه‌ردێ‌ ل پارێزگه‌هێ‌ وچه‌ند ئه‌ندازیارێن كارگێریا خوجهی ل پارێزگه‌ها دهوكێ‌ سه‌را قه‌زا زاخو وناحیێن باتیفا وده‌ركارێ‌ دا ژلایێ‌ بوتان محسن قایمقام قه‌زایێ‌ ورێڤه‌به‌رێن ناحیێن ناڤبری پێشوازیا لێ‌ هاته‌ كرن.

دهه‌ڤدیتنێن جودا جودا دا به‌حسێ‌ ره‌وشا خه‌لكێ‌ ده‌ڤه‌رێ‌ وپێدڤیا وان ب پروژێن خزمه‌تكاری هاته‌ كرن.

پاش پارێزگه‌رێ‌ دهوكێ‌ جودا جودا پێنچ قوتابخانه‌ ڤه‌كرن ئه‌وژی ئه‌ڤه‌ بوون:- (قوتابخانا كه‌ژین یا تێكهه‌ل ل سه‌نته‌رێ‌ ناحیا باتیفا –ئاماده‌یا ده‌ركارێ‌ یا تێكهه‌ل ل سه‌نته‌رێ‌ ناحیا ده‌ركارێ‌ - قوتابخانا هوزان و وگولدار ل تاخێ‌ شكه‌فتمارا ل سه‌نته‌رێ‌ قه‌زا زاخو - قوتابخانا گولشاد وزیندا ل تاخێ‌ ركاڤا ل سه‌نته‌رێ‌ قه‌زا زاخو - قوتابخانا لاڤین یا بنه‌ره‌ت ل تاخێ‌ بێدارێ‌ ل سه‌نته‌رێ‌ زاخو ) .

هه‌ژی گوتنێ‌ یه‌ هه‌ر پێنچ قوتابخانه‌ (18) پولینه‌ وژسێ‌ قاتا وهول وجهێن خزمه‌تكاری پێك دهێن وب ته‌رزه‌كێ‌ مودرن ل سه‌ر بودجا حكومه‌تا كوردستانێ‌ یا پترودولار بكوژمێ‌ پتر ژ (7) ملیون و(522) هزار دولاران هاتینه‌ ئاڤاكرن وهه‌موو دسالا نوو یا خاندنێ‌ دا (2019- 2020) كه‌فتینه‌ دخزمه‌تا قوتابییان دا.

ل دور ئه‌نجامێن سه‌ره‌دانێ‌ وگرنگیا ڤه‌كرنا وان پێنچ قوتابخانان پارێزگه‌رێ‌ دهوكێ‌ گوت: مه‌ره‌ما سه‌ره‌كی یا سه‌ره‌دانێ‌ ڤه‌كرنا ڤان پێنچ قوتابخانان بوو سێ‌ ژوان ل سه‌نته‌رێ‌ قه‌زا زاخووبوون وئێك ل ناحیا باتیفا ویا دی ل سه‌نتره‌ێ‌ ناحیا ده‌ركارێ‌ ڤان قوتابخانا گرنگیا خو هه‌یه‌ دێ‌ قه‌ره‌بالغ ل سه‌ر قوتابخانێن دی كێمكه‌ن وئاریشا نه‌بونا ئاڤاهیان لڤێ‌ ده‌ڤه‌رێ‌ دێ‌ هێته‌ كێمكرن ، دپلانا پارێزگه‌هێ‌ دایه‌ كو چار قوتابخانێن دن ژی ل زاخو ئاڤاكه‌ین پارێ‌ ڤان پروژان ژلایێ‌ حكومه‌تا هه‌رێما كوردستانێ‌ هاتیه‌ دابینكرن.

ل دور ئاریشه‌ وپێدڤیێن خه‌لكێ‌ قه‌زا پارێزگه‌رێ‌ دهوكێ‌ گوت: دێ‌ هه‌ولده‌ین ل دوڤ پلانا پارێزگه‌هێ‌ وبودجا به‌رده‌ست پروژێن خزمه‌تكاری ژی ل سنورێ‌ قه‌زا زاخو بجه ئینین وده‌ست خوشی ل وان هه‌موو لایه‌نان كر یێن بوینه‌ هاریكار بو ئاڤاكرنا وان پێنچ قوتابخانا.

پاش پارێزگه‌رێ‌ دهوكێ‌ ویێن دگه‌لدا سه‌را پروژێ‌ راستڤه‌كرنا ده‌وروبه‌رێن پرا ده‌لال دگه‌ل سه‌خبێركرنا لایێ‌ باكورێ‌ پرا ده‌لال دا وژنێزیك سه‌حكره‌ قوناغێن بجهئینانێ‌ كاری .

هه‌ژی گوتنێ‌ یه‌ ل سه‌ر بودجا حكومه‌تا هه‌رێمێ‌ وب رێكا سه‌روكاتیا باژێرڤانیا زاخو پروژێ‌ ناڤبری بكوژمێ‌ (990) ملیون دیناران دهێته‌ ئه‌نجامدان وهه‌تا نوكه‌ 95% هاتیه‌ بجه ئینان.