رێڤه‌به‌را په‌روه‌ردێ دگه‌ل رێڤه‌به‌رێن قوتابخانێن سیسته‌مێ ئێنگلیزی کومبوو

    به‌لاڤكرن: په‌روه‌ردا دهۆك روژهه‌لات
    28 كانوونا دووێ 2019

رێڤه‌به‌را په‌روه‌ردێ دگه‌ل رێڤه‌به‌رێن قوتابخانێن سیسته‌مێ ئێنگلیزی کومبوو


ئه‌ڤرو روژا دووشه‌مبى رێكه‌فتى 28/1/2019 ب سه‌رپه‌رشتیا رێڤه‌به‌را په‌روه‌ردا قه‌زا دهۆک رۆژهه‌لات و ب به‌رهه‌ڤبوونا سه‌رپه‌رشتیارێ ئێکێ یێ په‌روه‌رده‌یی و سه‌رپه‌رشتا بسپوری یا بابه‌تێ زانستێ ل په‌روه‌ردا رۆژهه‌لات كومبونه‌كا تایبه‌ت ل گه‌ل قوتابخانێن سیسته‌مێ ئێنگلیزی ل كوچكا رێڤه‌به‌ريا په‌روه‌ردا قه‌زا دهۆک رۆژهه‌لات هاته‌ كرن.

دكومبونێ دا و ب به‌رهه‌ڤبوونا رێڤه‌به‌رێن قوتابخانێن سیسته‌مێ ئێنگلیزی رێڤه‌به‌را په‌روه‌ردێ سه‌ره‌رایی ده‌ستخوشیان ل ئاماده‌بوویان دووپاتی ل گرنگیا سیسته‌مێ ناڤبری کر و دانوستاندن لسه‌ر چه‌ندین ته‌وه‌ران و ئاستێ زانستی یێ قوتابخانێن ناڤبری هاته‌کرن و گرنگترین خال و رێنمایێن گرێدایی قوتابخانێن ناڤبری ب درێژی به‌حس کر.

پاشان ده‌لیڤه‌ دا سه‌رپه‌رشتیارێن په‌روه‌رده‌یی و رێڤه‌به‌رێن قوتابخانا ، وان ژی تێبینی و گله‌و گازنده‌ و پێدڤی و کێماسیێن خو ئاراسته‌یی رێڤه‌به‌را په‌روه‌ردێ کرن بۆ پتر پێشئێخستنا وان قوتابخانا داکو پرۆسه‌یه‌کا سه‌رکه‌فتی بیت.

لدۆماهیێ رێڤه‌به‌را په‌روه‌ردێ ب هه‌می شیان پالپشتیا رێڤه‌به‌ریا گشتی یا په‌روه‌ردێ و په‌روه‌ردا دهۆک رۆژهه‌لات بۆ ڤان قوتابخانا دیار کر و گۆت ژی دێ گرنگیه‌کا تایبه‌ت بۆ هێته‌ کرن و به‌رده‌وام دیفچوونا ئاستێ وان هێته‌ کرن.

هه‌ژی گوتنێ یه‌ ل سنورێ په‌روه‌ردا قه‌زا دهۆک رۆژهه‌لات هه‌ڤده‌ قوتابخانێن سیسته‌مێ ئێنگلیزی ب خوڤه‌ دگریت و پرۆسه‌ ب شێوه‌کی سه‌رکه‌فتی رێڤه‌دچیت.