شانده‌كێ ئاست بلندێ په‌روه‌ردێ ب مه‌ره‌ما خورتكرنا په‌يوه‌نديان سه‌را زانكويا جيهان دا

    به‌لاڤكرن: په‌روه‌ردا دهۆك روژهه‌لات
    22 كانوونا دووێ 2019

شانده‌كێ ئاست بلندێ په‌روه‌ردێ ب مه‌ره‌ما خورتكرنا په‌يوه‌نديان  سه‌را زانكويا جيهان دا 


ئه‌ڤرو سپێدێ رێكه‌فتى 22/1/2019 شانده‌كێ ئاست بلندێ په‌روه‌ردێ ب سه‌روكاتيا به‌رێز عمر على تاها رێڤه‌به‌رێ گشتى يێ په‌روه‌ردێ ل پارێزگه‌ها دهوكێ وب مه‌ره‌ما خورتكرنا په‌يوه‌نديان سه‌را زانكويا جيهان دا وژلايێ به‌رێزان د. زيره‌ڤان عبدالمحسن سه‌روكێ زانكويێ وپ.د ابراهيم سمو ئه‌ندامێ ده‌سته‌يا گشتى يا ئه‌ميندارى يا سه‌روكاتيا زانكويێن جيهان وژماره‌كا سه‌روك به‌شين زانكويێ پێشوازى لێ هاته‌ كرن .

دروينشتنه‌كێدا سه‌روكێ زانكويا جيهان سه‌ره‌راى ب خێرهاتنا شاندێ په‌روه‌ردێ ب گرنگى دا زانين كو په‌روه‌رده‌ وزانكو تمامكه‌رێن ئێكن وپێدڤى يه‌ هه‌ڤكارى وهه‌ماهه‌نگى وپه‌يوه‌ندى دناڤبه‌را ڤان هه‌ردوو كه‌رتێن گرنگ دا ل ئاسته‌كێ زور باش بيت بو خزمه‌تكرنا جڤاكى .

ژلايێ خوڤه‌ به‌رێز رێڤه‌به‌رێ گشتى يێ په‌روه‌ردێ كورتيه‌ك دا سه‌ر سه‌روبه‌رێ په‌روه‌ردێ ل كوردستانێ ب گشتى و ل پارێزگه‌ها دهوكێ ب تايبه‌تى وئه‌و ئاريشه‌ وكێماسيێن هه‌ى وب ده‌رفه‌ت دا زانين كو پره‌كا هه‌ڤكاريێ دناڤبه‌را زانكو وپه‌روه‌ردێ دا بهێته‌ ئاڤاكرن كو ل پاشه‌روژێ هه‌مى ئه‌و پێدڤى وكيماسيێن هه‌ى برێكا ڤان هه‌ردوو ده‌زگه‌هێن ئاڤاكرنا مروڤى ( په‌روه‌رده‌ وزانكو ) بهێنه‌ چاره‌سه‌ركرن ب رێيه‌كا ئه‌كاديمى وده‌رئه‌نجام دا خزمه‌ته‌كا ژهه‌ژى بو به‌ره‌بايێن ئێك لدويف ئێكن جڤاكێ مه‌ بهێته‌ كرن .

پاشان كومبونه‌كا تايبه‌ت لسه‌ر چه‌ند بابه‌تێن گڕيداى گه‌شه‌پێدانا مروڤى بو پێشئيخستنا كادر وماموستايێ په‌روه‌ردێ ب رێكا مه‌شقكرنه‌كا زانستى پيشه‌يى هاته‌ كرن . دكومبونێ پ . د ابراهيم سمو ئه‌ندامێ ده‌سته‌يا گشتى يا ئه‌ميندارى يا سه‌روكاتيا زانكويێن جيهان به‌حسێ گرنگيا هه‌ڤكارى وهه‌ماهه‌نگيێ كر دناڤبه‌را ڤان هه‌ردوو دام وده‌زگه‌هان دا وبه‌رهه‌ڤيا ده‌سته‌يا گشتى يا ئه‌ميندارى بو هه‌ر جوره‌ هاريكارى وهه‌ڤكارييه‌كێ بو په‌روه‌ردێ دا دياركرن .

ديسان دكومبونێ دا به‌حسێ چه‌ندين ميكانيزما ئه‌نجامدانا كارى هاته‌ كرن وبريار هاته‌ دان ليژنه‌يه‌كا تايبه‌ت ژهه‌ردوو لا بهێته‌ پێك ئينان بو دويڤ چون وهه‌ماهه‌نگيێ و ل پاشه‌روژه‌كا نێزيك كاره‌كێ هه‌ڤپشك بو پێشئێخستنا شيانێن ماموستا بهێته‌ كرن .

لدوماهيا سه‌ره‌دانێ شاندێ رێڤه‌به‌ريا گشتى گه‌ريانه‌ك دناڤ پشك وئاڤاهيێن زانكويا جيهان كر وژنێزيك ئاگه‌هدارى ره‌وشا زانكويێ بون .